कविता:पानीको कुवा र यात्रीहरु I
जीतेन खड्का
बिम्ब र प्रतिकको छायामा बसेका
केहि परिचित लाग्ने त
केहि अपरिचित देखीने
सहयात्री र यात्रीहरुलाई सोधे,
यो बाटो हिड्दै जाँदा
कहाँ भेटिने होला पानीको कुवा ?
सायद सबैलाई हत्तर नै रहेछ क्यारे !
कसैबाट अपेक्षित उत्तर आएन,
लाग्छ यहाँ भएको म र अरु सबै
एक-आपसमा प्रतिस्पर्धी हौँ
जो प्रतिस्पर्धा जित्ने दाउमा छौ ||
हो ! यहाँ सबै
यात्रीहरु म र मेरो समय जस्तै
अतीव तिर्खाएका छन्
र त आ-आफ्नै शैली र गतिमा
अरु यात्रीहरुलाई उछिन्दै
सबै भन्दा अगाडि
पानीको कुवालाई भेटी प्यास मेट्न आतुर छन्
किनकि,यिनीहरु पनि
म जस्तै भनौ या हामी जस्तै
पिठिउँमा भारी बोकी
कोही नयाँ-नौलो बाटाहरु खोज्दै
त कोही पुरानै बाटाहरु रोज्दै
अविच्छिन्न हिडीरहेका छन्, हिडीरहेका छन्
कोही बाटाभरि अमिट पाईलाहरु छोड्दै,
कोही पाईलाहरुलाई पछ्याउदै पछ्याउदै ||
Posted by Unknown
on 2:35 PM.
Filed under